2017-01-17 14:53:00

БИЛИМДОН ЎҚУВЧИЛАР САРАЛАНДИ

Мактаб ўқувчиларининг билим даражасини аниқлаш, умумтаълим фанларига қизиқишини янада ошириш ва уларни рағбатлантириш мақсадида ҳар йили 9-синф ўқувчилари ўртасида анъанавий тарзда фан олимпиадаси ўтказиб келинмоқда. Шу кунларда беллашувнинг туман босқичлари бўлиб ўтмоқда.

Пойтахтимиздаги 184-мактаб мезбонлик қилган Чилонзор тумани босқичида ҳудуддаги 31 та мактабдан 500 нафар ўқувчи 17 фан кесимида ўзаро баҳс олиб борди.

Қатнашчилар олимпиаданинг биринчи кунида саволларга ёзма шаклда жавоб берган бўлса, иккинчи куни тест синовидан ўтишди. Уларнинг ишини холисона баҳолаш, энг муносибларини аниқлаш учун малакали, тажрибали педагоглардан таркиб топган ҳакамлар ҳайъати шакллантирилди.

Шунингдек, Юнусобод туманидаги 274-мактабда 548 нафар 9-синф ўқувчилари билимларини синовдан ўтказди. Синовлар юқори савияда ўтиши учун барча шароитлар яратилди. Ҳакамлар ҳайъати ва апелляция комиссияси шакллантирилди. Ўқув-лаборатория хоналари ҳамда зарур жиҳозларнинг шайлиги ўқувчиларга амалий синов жараёнида қулайлик яратди.

Фан олимпиадасининг Олмазор тумани босқичида дастлабки саралашда ғолибликни қўлга киритган 634 нафар ўғил-қиз кейинги босқич йўлланмаси учун куч синашди. Якунда 76 балдан юқори кўрсаткич қайд этган 1-, 2- ҳамда 3-ўрин эгалари кейинги босқичда иштирок этиш ҳуқуқини қўлга киритди.

“Туркистон-пресс”