2017-08-07 10:10:00

ЁШ ПОЛВОНЛАРИМИЗ ЖАҲОН ЧЕМПИОНАТИДА 3 ТА МЕДАЛНИ ҚЎЛГА КИРИТИШДИ

Жорий йилнинг 1-6 август кунлари Финляндиянинг Тампере шаҳрида спорт курашлари бўйича ёшлар ўртасида жаҳон чемпионати бўлиб ўтди. Ушбу нуфузли мусобақада Ўзбекистон терма жамоасининг 13 нафар аъзоси ҳам иштирок этди.

Эркин кураш бўйича ўтказилган беллашувларда -74 килограмм вазн тоифасида гиламга чиққан Иса Шапиев ўз вазн тоифасида барча рақибларини сезиларли устунлик билан мағлубиятга учратган ҳолда финал йўлланмасини қўлга киритди.

Ярим финалда япониялик рақибини ортиқча қийинчиликсиз енгган Иса Шапиев ҳал қилувчи баҳсда жаҳоннинг амалдаги чемпиони америкалик Майк Жон Холл II га қарши кураш олиб борди. Кескин ва муросасиз руҳда кечган баҳсда тажриба ўз сўзини айтди ва АҚШлик спортчи қаторасига иккинчи марта ўз вазн тоифасида жаҳоннинг тенгсиз полвони эканлигини амалда исботлай олди. Иса Шапиев эса бу сафар кумуш медаль билан кифояланди. 

Юнон-рум кураши бўйича ўтказилган баҳсларда вазни 50 килограммгача бўлган полвонлар ўртасида Илҳом Баҳромов мусобақа давомида туркиялик Жемал Мутлу, қозоғистонлик Алпомиш Достонбекни мағлубиятга учратиб, ярим финал йўлланмасини қўлга киритганди. Аввалги жаҳон чемпионатида кумуш медалига сазовор бўлган Илҳом, афсуски, бу сафар финал йўлланмаси тақдири ҳал бўлган беллашувда амалдаги жаҳон чемпиони — эронлик Поя Сулат Дадмарзга кичик ҳисобда ютқазди. Шунга қарамай бронза медали учун курашиш имкониятини сақлаб қолган Баҳромов хитойлик Хай Фенг Ченгни енгиб, шоҳсупанинг учинчи поғонасига кўтарилди. 

Терма жамоамизга Финляндиядаги жаҳон чемпионатида сўнгги медални юнон-рум кураши бўйича 55 килограмм вазн тоифасида гиламга чиққан Тўрабек Тиркашев тақдим этди. Тўрабек илк баҳсда АҚШ вакили Рандон Дрю Мирандани 6:5 ҳисобида мағлуб этган бўлса, чорак финалда хитойлик Лигуо Саодан 9:1 ҳисобида устун келди. Бироқ, ҳамюртимиз ярим финалда туркиялик Керем Камалга имкониятни бой бериб қўйди. 

Бронза медали тақдири ҳал бўлган баҳсда эса 2015 йилги Осиё чемпиони Тўрабек Тиркашев молдовалик Сергей Жепанга ҳеч қанда имконият қолдирмади ва жангни 8:0 ҳисобида ўз фойдасига ҳал қилиб, бронза медалига сазовор бўлди.

Жаҳон чемпионати якунида ўзбек полвонлари 1 та кумуш ва 2 та бронза медалларига эга чиқишди. 

Ўрол ҲАМИДУЛЛАЕВ,

“Туркистон-пресс”