2017-11-21 18:08:00

ХАВФСИЗЛИКНИ ТАЪМИНЛАШГА БАРЧА БУРЧЛИ

Темир йўлларни иқтисодиётимизнинг қон-томирига қиёслашади. Бу бежиз эмас, албатта. Темир йўл соҳаси аҳоли ва хорижлик меҳмонларнинг узоғини яқин, оғирини енгил қилиш билан бирга, мамлакат иқтисодий салоҳиятини юксалтиришга ҳам хизмат қилади. Сўнгги йилларда мамлакатимизда темир йўл транспорти хизмати такомиллашиб, хизмат сифати сезиларли даражада ошди. Республикамиз бўйлаб бунёд этилган замонавий вокзаллар, қурилган янги йўллар, мавжуд темир изларни реконструция қилиш ва электрлаштириш, юк ҳамда йўловчи ташишнинг замонавий усулларини жорий этиш борасида амалга оширилган ишлар туфайли мазкур тармоқ тараққиётнинг муҳим стратегик йўналишларидан бирига айланди. Ҳар томонлама қулай, замонавий талабларга тўла жавоб берадиган, юқори тезликда ҳаракатланувчи ва энг асосийси, хавфсиз бўлган темир йўл транспорти ҳамюртларимизнинг оғирини енгил қилиб келмоқда. Бу, ўз навбатида, соҳа ривожининг жадал одимлаётганидан дарак беради.

Афсуски, ижобий янгиликлар билан биргаликда киши дилини хира қиладиган салбий ҳолатлар ҳам учраб турибди. Буни масъулиятсиз ва назоратсиз ёшлар томонидан темир йўл ҳудудининг баъзи жойларида ўрнатилган девор ва панжара тўсиқларни бузиш, йўловчи поезд вагонларининг деразаларига шикаст етказишда кўриш мумкин. Ачинарлиси, ёшларни тўғри йўлга бошлаши лозим бўлган, ҳаётий тажрибага эга бўлган катталар кўп ҳолларда қоидабузарлар “фаолиятига” кўз юмишмоқда, баъзан ҳатто ўзлари ҳам “намуна” кўрсатишяпти.

Ўзбекистон Республикаси “Маъмурий жавобгарлик тўғрисида”ги Кодексининг 121-моддасида локомотивлар, вагонлар, дарё ва ҳаво кемалари, шунингдек, ҳамма турдаги махсус транспортларининг ойналари ва ички жиҳозларига шикаст етказиш энг кам ойлик иш ҳақининг ўн бараваридан ўн беш бараваригача жарима билан жазоланиши белгилаб қўйилган. Аммо ушбу қоидалар баъзи кимсаларга кор қилмайдиганга ўхшаб турибди.

Биргина жорий йилнинг ўтган вақти давомида юқори тезликда ҳаракатланувчи “Afrosiyob” поездларида 18 маротаба тош отиш натижасида вагон ойналарини синдириш ҳолатлари қайд этилган. Транспортдаги ИИБ ходимларининг тезкор ва самарали олиб борилган ишлари натижасида қоидабузарлар аниқланиб, жазо чоралари кўрилган. Қоидабузарликларни бартараф этиш ва олдини олиш мақсадида мунтазам чора-тадбирлар амалга ошириляпти.

Жумладан, Ўзбекистон Республикаси Транспорт прокуратураси, Транспортдаги ИИБ ва «Ўзбекистон темир йўллари» акциядорлик жамияти Ҳарбийлаштирилган қўриқлаш бошқармаси ходимлари темирйўлга яқин ҳудудда жойлашган маҳалалар, аҳоли пунктлари, ўқув муссасаларида тушунтириш ва профилактик тадбирларни мунтазам ташкил этиб келишмоқда. Аммо ҳар қандай вазиятда ҳам фуқароларимизнинг ўзлари теварак-атрофларида содир бўлаётган ҳар бир ҳолатга синчков бўлишлари, масъулият ва назоратни оширишлари давр талабига айланиб улгурди. Фуқаролик жамиятининг асосий тамойили жамоатчилик назоратини ўрнатишда гавдаланади.    

Хулоса ўрнида шуни айтиш мумкинки, айрим оилалардаги болалар тарбиясидаги масъулиятсиз ёндашув, маҳалла аҳлининг эътиборсизлиги натижасида келажакда Ватанимиз корига ярайдиган инсон бўлиб камолга етиши мумкин бўлган фарзандларимиз балоғат ёшига етар-етмай қонун олдида жавобгар бўлиб қолишмокда. Ёшлигидан “эгри йўлга” қадам қўйган келажагимиз эгалари ўзга фуқаролар ҳаёти ва соғлиғига хавф солиш билан биргаликда темирйўлдан фойдаланаётган сайёҳларда тарихи минг йилликларга бориб тақаладиган халқимиз ва мамлакатимиз тўғрисида мавжуд бой ижобий фикрини ўзгаришига сабабчи бўлаётганини билишармикан?! Зеро, кичкинадек кўринган қоидабузарликлар натижаси киши ўйлаганидан юз чандон оғир оқибатларга олиб келиши мумкинлигини асло унутмаслигимиз лозим.

Фирдавс ХАЙРИДДИНОВ,

“Ўздавтемирйўлназорат” ДИ Ахборот хизмати бошлиғи.

“Туркистон-пресс”.