2018-02-02 08:23:00

НАҚД ХОРИЖИЙ ВАЛЮТА: ҚАНЧА ОЛИБ КИРИШ ВА ҚАНЧА ОЛИБ ЧИҚИШ МУМКИН?

Ўзбекистон Республикаси Адлия вазирлигининг «Ҳуқуқий ахборот» каналида ҳукуматимиз томонидан жисмоний шахслар томонидан нақд хорижий валютани Ўзбекистон Республикасининг божхона чегараси орқали олиб кириш ва олиб чиқиб кетиш қоидалари тасдиқлангани ҳақида хабар берилмоқда.

Эндиликда республика ташқарисига нақд хорижий валютани эркин олиб чиқиб кетиш жисмоний шахсларга эквиваленти 5 000 (беш минг) АҚШ долларига тенг ёки ундан ошмайдиган миқдорда божхона назорати қоидаларига риоя қилган ҳолда рухсат этилади.

Белгиланган суммадан ортиқча маблағни олиб чиқиб кетиш:

резидентлар (республика ҳудудида доимий яшовчи шахс) томонидан - Марказий банкининг рухсатномаси асосида амалга оширилади, ушбу рухсатномада олиб чиқиб кетиладиган нақд хорижий валютанинг жами суммаси кўрсатилади;

норезидентлар (республикада доимий яшамайдиган шахс) томонидан - республикага кириш чоғида тўлдирилган йўловчи божхона декларацияси асосида амалга оширилади.

Бунда 2 000 АҚШ долларигача бўлган нақд хорижий валюта жисмоний шахснинг хоҳишига кўра декларацияланиши мумкин.

Шу билан бирга, жисмоний шахсларга республика ҳудудига божхона назорати қоидаларига риоя қилган ҳолда чекланмаган миқдорда нақд хорижий валютани олиб киришга рухсат этилади.

“Туркистон-пресс”.