2018-03-30 15:23:00

ПРЕЗИДЕНТ ЖИЗЗАХДА ҚУРИЛИШ МАТЕРИАЛЛАРИ КОРХОНАЛАРИНИ КЎПАЙТИРИШ БЎЙИЧА ТОПШИРИҚ БЕРДИ

Шавкат Мирзиёев Жиззах шаҳри Мустақиллик кўчасида бунёд этилаётган кўп қаватлиуйлар қурилишини кўздан кечирди.

Бу ерда 10 та 7 қаватли уй барпо этилмоқда. Жорий йил Мустақиллик байрами кунлари уларнинг фойдаланишга топширилиши натижасида 420 та оила янги уйли бўлади. Бу ҳақида Президентнинг Матбуот хизмати хабар берди.

Биргина бу эмас. Ҳали олдинда амалга ошириладиган бунёдкорлик ишлари талайгина. Шароф Рашидов тумани Учтепа шаҳарчасида кўп қаватли, “Тоқчилик” қишлоқ фуқаролар йиғинида арзон уй-жойлар қуриш, Ислом Каримов кўчаси бўйича замонавий инфратузилма объектлари барпо этиш, Тошкент ва Алишер Навоий кўчалари кесишган ҳудуд қиёфасини ўзгартириш, ичимлик суви таъминотини яхшилаш ва бошқа лойиҳалар режалаштирилган.

Давлатимиз раҳбари бу ишларга зарур қурилиш материалларини вилоятнинг ўзида ишлаб чиқариш, бу борадаги тажриба ва технологияга эга заводларни жалб этиб, шундай корхоналар ташкил қилиш бўйича топшириқлар берди.

“Туркистон-пресс”