2018-05-24 14:39:14

ДУНЁДА ЭНГ КАТТА БОЙЛИК — ЁШЛИКДА ОЛИНГАН БИЛИМ ВА ЭГАЛЛАНГАН КАСБ-ҲУНАРДИР!

Жорий йилда республикамиздаги 9 628 та умумтаълим мактабларининг 475 276 нафар 9-синф битирувчиларини 11 йиллик таълим тизимининг  10-синфига ва академик лицейларнинг биринчи босқичига қамраб  олинади.

2017-2018 ўқув йилининг якунига бағишланган тадбирлар “Қадрдон мактабимиз бағрида ўқиб-ўрганиш, доимо изланиш, янгиликка, тараққиёт чўққиларини эгаллашга интилиб яшаймиз!” шиори остида ўтказилинади.Бу ҳақда Халқ таълими вазирлиги Матбуот хизмати хабар берди.

Тадбирлар жорий йилнинг 25 май куни республикамизнинг барча мактабларида эрталаб соат 08:30 да бошланади ва соат 10:00 да якунланади.

Тадбирнинг асосий ғояси Ўзбекистон Республикаси Президенти Шавкат Мирзиёевнинг “Дунёда энг катта бойлик-ёшликда олинган билим ва эгалланган касб-ҳунардир” деган ибораларининг мазмун-моҳиятини ўқувчи-ёшларга етказиш, ёшлар онгида Ватанга муҳаббат, кекса авлод вакилларига ҳурмат, тинчлик ва осойишталикка дахлдорлик туйғуларини кучайтиришга қаратилади.

Тадбирларда 2017-2018 ўқув йилини якунлаш, келгуси ўқув йилидан бошланғич синфларда ҳафтасига 5 кунлик ўқиш тизимига тўлиқ ўтилиши тўғрисида ота-оналар, маҳалла ва кенг жамоатчиликка етказиш, 11 йиллик умумий ўрта таълим тизимининг мазмун-моҳиятини ўқувчи ёшларга тушунтириш, ушбу таълим тизими жараёнида ўқувчиларнинг турли касб эгалари бўлиш имкониятлари ҳақида батафсил маълумот беришга эътибор қаратилади.

Тадбирларда ўқув йили давомида республика ва халқаро фан олимпиадалари, мусиқа танловлари ва спорт мусобақаларида муваффақиятли иштирок этган, билимлар беллашуви, инновацион олимпиада ва “Умид ниҳолари”да фаол қатнашган ўқувчилар, аъло баҳоларга ўқиган, намунали хулққа эга бўлган, босқичли назорат имтиҳонларидан озод бўлган ёшлар фахрий ва мақтов ёрлиқлари билан тақдирланади.

Ўтказиладиган тадбирларда мактаб ва ўқувчи-ёшлар ҳаётига мос бўлмаган ортиқча дабдабабозликни чеклаш масалаларига алоҳида эътибор қаратилади.

“Туркистон-пресс”