2018-05-27 09:34:00

“GM UZBEKISTAN” АТРОФИДА СОДИР БЎЛАЁТГАН НОХУШ ВАЗИЯТЛАР МУҲОКАМА ҚИЛИНДИ

“GM UZBEKISTAN” АТРОФИДА СОДИР БЎЛАЁТГАН НОХУШ ВАЗИЯТЛАР МУҲОКАМА ҚИЛИНДИ

 

Маълумки, сўнгги вақтларда интернет ва оммавий ахборот воситалари орқали “GM Uzbekistan” АЖ атрофида содир бўлаётган нохуш вазиятлар юзасидан турли хабарлар тарқалмоқда.

Жорий йилнинг 25 май куни Асака автомобиль заводида “Ўзавтосаноат” АЖ раҳбарияти ва компания бош директори бошчилигида ўтказилган йиғилиш сўнгги вақтларда юзага келаётган бундай нохуш вазиятларни олдини олишга бағишланди. Бу ҳақда  “Ўзавтосаноат” АЖ матбуот хизмати хабар берди.

Йиғилишни ўтказишдан асосий мақсад — соҳада фаолият олиб бораётган ҳар бир ходимга мамлакатимизда қонун устувор экани ва ҳар бир жиноятга жазо муқаррарлигини яна бир бор етказиш, коррупцияга қарши курашиш бўйича уларнинг ҳуқуқий онги ва маданиятини юксалтириш, уларда коррупцияга нисбатан муросасиз муносабатни шакллантиришдан иборат бўлди.

Тадбирда “Ўзавтосаноат” АЖ, Давлат хавфсизлиги хизмати, Прокуратура, ИИБнинг ҳуқуқни муҳофаза қилиш органлари, “ДжиЭм Ўзбекистон” АЖ ҳамда Андижон вилоятидаги “Ўзавтосаноат” таркибига кирувчи барча қўшма корхоналар раҳбар ходимлари иштирок этдилар.

Йиғилиш якунида сўнгги вақтларда тарқалаётган ҳолатларни олдини олиш юзасидан тегишли чора-тадбирларни амалга ошириш тўғрисида қарорлар қабул қилиниб, устувор вазифалар белгилаб олинди.

 

“Туркистон-пресс”