2018-06-05 14:30:12

УМИД АҲМАДЖОНОВ АМАЛИЙ ТАШРИФ БИЛАН ЯПОНИЯГА ЙЎЛ ОЛДИ

Ўзбекистон миллий олимпия қўмитаси президенти ва Ўзбекистон футбол ассоциацияси 1-вице-президенти Умид Аҳмаджонов Токио-2020 Олимпиадаси ташкилий қўмитаси раҳбарлари билан учрашиш учун Японияга йўл олди. Бу ҳақда ЎФА расмий сайти хабар берди.

Японияда Умид Аҳмаджонов Токиода Олимпия ва Паралимпия ўйинлари ўтказиш вазири Тошиаки Эндо билан учрашади. Учрашув давомида Олимпиадага тайёргарлик бўйича олиб борилаётган ишлар муҳокама қилинади. Шунингдек, Ўзбекистон миллий олимпия қўмитаси президенти Япония миллий олимпия қўмитаси президенти билан ҳам учрашиши кўзда тутилган. Ушбу учрашувда икки мамлакат Олимпия ўйинлари ҳаракати доирасида амалга оширилаётган чора-тадбирлар, Олимпия спорт турларининг ривожи йўлидаги ислоҳотлар муҳокама қилинади.

Таъкидлаш лозимки, ўзбекистонлик спортчилар Токиода бўлиб ўтадиган Олимпиада ўйинларига жиддий тайёргарлик кўришмоқда. Футбол бўйича Ўзбекистон Олимпия терма жамоаси олдига Токио-2020га йўлланмани қўлга киритиш бош вазифа қилиб қўйилган бўлса, бошқа спорт турларида Олимпия ўйинларида совринли ўринларни, олтин медалларни қўлга киритиш асосий мақсад ҳисобланади. Япония сафари давомида бу борадаги амалга оширилаётган ишлар бўйича ўзаро фикр алмашилади.

“Туркистон-пресс”