2018-08-27 13:10:41

УРГАНЧДА МАТЕМАТИКА БЎЙИЧА ХАЛҚАРО ОЛИМПИАДА ЎТКАЗИЛАДИ

Ўзбекистон олий таълим муассасалари талабалари ўртасида математика бўйича Муҳаммад ал-Хоразмий номидаги Халқаро олимпиадани ўтказиш тўғрисидаги ҳукумат қарори қабул қилинди, дея хабар қилди Адлия вазирлиги «Ҳуқуқий ахборот» Telegram-каналида.

Қарорга мувофиқ Фан ва технологиялар бўйича Ислом ҳамкорлик ташкилоти ва бошқа халқаро ташкилотлар билан ҳамкорликда ҳар икки йилда бир марта математика бўйича Халқаро олимпиада ташкил этилади.

Шу муносабат билан қарорга мувофиқ Халқаро олимпиадани ўтказиш бўйича низом ва ташкилий қўмита таркиби тасдиқланди. Ташкилий қўмитага Бош вазир ўринбосари А. Абдуҳакимов раислик қилади.

Биринчи Олимпиада 2018 йил октябрь ойининг учинчи ўн кунлигида Урганч шаҳрида ташкил этилади.

Олимпиада ғолибларига (Ўзбекистон фуқаролари) математика, физика, ахборот технологиялари йўналишлари бўйича магистратура босқичига квотадан ташқари давлат гранти асосида ўқишга кириш ҳуқуқи берилади.