2018-09-07 13:18:56

ШОХПАХТА ГАЗ КОНИ БЎЙИЧА ХАЛҚАРО ҲАМКОРЛИК ЯНА 5 ЙИЛГА УЗАЙТИРИЛДИ

Жорий йилнинг 30 август куни “Россия 24” канали Ўзбекистон Республикаси Президенти томонидан Шохпахта конида қўшма газ ишлаб чиқариш лицензиясини яна беш йилга узайтириш бўйича фармоннинг имзоланишига бағишланган лавҳани эфирга узатди.

Газ қазиб олиш бўйича амалдаги лицензиянинг муддати 2019 йилнинг март ойида тугайди.

Лицензия муддатини яна 5 йилга узайтириш нияти шу йилнинг май ойида Россиянинг Санкт-Петербург шаҳрида бўлиб ўтган Халқаро иқтисодий форуми давомида “Ўзбекнефтгаз” АЖ ва “Газпром” ДАЖ ўртасида тегишли ҳужжатнинг имзоланиши орқали тасдиқланган эди. Бу ҳақда “Ўзбекнефтгаз” матбуот хизмати хабар берди.

2018 йилнинг 20 августида Ўзбекистон Республикаси Президенти айни масала юзасидан тегишли қарорни имзолаган. 2002 йилнинг февралида газни қазиб олиш ишлари тўҳтатилган эди.

2002 йилнинг 17 декабрида “Газпром” ОАЖ ва “Ўзбекнефтгаз” МХК газ соҳасида стратегик ҳамкорлик бўйича Келишувни имзолашган. Ушбу ҳужжатда икки давлатнинг газ соҳасидаги мунособатлари аниқ белгиланган.

Келишувда, шунингдек, маҳсулот тақсимоти бўйича шартномалар шартларига мувофиқ газ қазиб олиш бўйича лойиҳаларни биргаликда амалга ошириш кўзда тутилган.

2004 йилнинг 14 апрель куни Тошкентда Шохпахта конида қўшимча қидириш ишларини олиб бориш бўйича Маҳсулот тақсимоти Келишуви имзоланган. Шохпахта бўйича келишувнинг амал қилиш муддати 15 йил этиб белгиланган.

Операторнинг асосий вазифаси тадқиқотлар олиб бориш, шунингдек, табиий газни қидириш, қазиб олиш ва транспортировка қилиш ишларини амалга оширишдир, шу жумладан, инфратузилма ва транспорт объектларини қуриш, газни тозалаш, уни сақлаш, атроф-муҳит муҳофазаси, ва Келишув доирасида белгиланган яна қатор бошқа ишларни бажаришдир.

2004 йилнинг август ойидан бери Шохпахта конида 4 миллиард куб метрдан ортиқ газ қазиб олинган. Коннинг қолдиқ заҳиралари эса лойиҳани муваффақиятли давом эттириш имкони борлигини кўрсатган.

2017 йилда газ қазиб олиш ҳажми 311,4 миллион куб метрни ташкил этган. 2018 йилинг бошидан 15 август кунига қадар ушбу кўрсаткич 176,4 миллион куб метрга етган. 

“Туркистон-пресс”