2019-01-21 15:20:03

САФИНА САЪДУЛЛАЕВА ҚОЗОҒИСТОНДАГИ МУСОБАҚАДА ҒОЛИБ БЎЛДИ

Қозоғистоннинг Оскемен шаҳрида Олимпиада чемпиони Ольга Рипакова соврини учун анъанавий бешинчи халқаро мусобақа ўтказилди. Турнирда Қозоғистон, Тожикистон, Туркия, Арманистон, Грузия, Беларусь, Украина ва Ўзбекистондан спортчилар иштирок этишди.

Аёллар ўртасида баландликка сакраш баҳсларида дастлабки икки ўрин ҳамюртларимизга насиб этди. Сафина Саъдуллаева 192 см баландликни забт этиб, ўз шахсий рекордини янгилади ва мусобақанинг олтин медалига сазовор бўлди.

Мусобақанинг кумуш медалини эса 188 см натижа кўрсатган Надия Дусанова қўлга киритди. Баландликка сакраш баҳсларида иштирок этган учинчи ҳамюртимиз Алина Яблокова 175 см натижа билан тўртинчи бўлди.

800 метрга югуриш баҳсларида Хуршид Аҳмадалиев 1:52.58 дақиқалик кўрсаткич билан ғалаба қозонди. 3000 метрга югуришда Отабек Тошқувватов 8:52.17 дақиқада олтинчи бўлиб маррага етиб келди. 60 метрга тўсиқлар оша югуриш беллашувларида Эргаш Нормуродов 8:21 сония натижа билан бешинчи поғонадан жой олди.

4х200 аралаш эстафетасида жамоамиз 1:36.67 натижа билан учинчи ўринни эгаллади.

“Туркистон-пресс”