2019-02-08 18:05:58

АЛИШЕР УСМОНОВ ТАҚДИМ ЭТГАН 8 МИЛЛИОН ДОЛЛАРГА ТЕНГ НОЁБ КИТОБЛАР ТЎПЛАМИ ТОШКЕНТГА КЕЛДИ

Алишер Усмонов томонидан Ислом цивилизацияси марказига тақдим этилган 8 миллион АҚШ долларга тенг ноёб китоблар тўплами Тошкентга етиб келди, дея хабар беради «Подробно».

Тўплам XIII асрдан бошлаб шарқий ва исломий оламнинг Европадаги таъсири ҳақида нашр этилган лотин, инглиз, француз ва немис тилларида нашр қилинган 4923 дона ноёб китоблардан иборат.

Улар орасида Авиценна «Тиббиёт илми қонуни» (Ибн Сино)нинг илк лотинча таржимаси бор.

Шунингдек, тўпламда Ибн Арабшоҳнинг «Буюк Темурнинг буюк ва мўъжизавий ишлари тарихи» номли китобининг лотин тилига илк таржимаси бор.

Ислом цивилизацияси Маркази қурилиши тугагунига қадар китоблар Шарқшунослик институтида сақланади.

Эслатиб ўтамиз, Алишер Усмоновнинг маблағлари ҳисобига қурилаётган Тошкентдаги Ислом цивилизацияси маркази лойиҳаси Франциянинг Wilmotte & Associés компанияси томонидан ишлаб чиқилмоқда.

Ушбу мажмуа халқаро стандартларга мос равишда қурилиши режалаштирилган бўлиб, кутубхона, ахборот ресурс маркази, илмий бўлим, конференция хонаси, офис ва бошқа биноларни ўз ичига олади.

Унинг рамзий пойдеворини 2018 йилнинг июнь ойида Ўзбекистон Президенти қўйган.

Фото: «Подробно»