2017-04-25

20 нафар йигит-қизлар никоҳ тўйлари куни иш билан таъминланди

Жорий йил 20 апрелдан 26 май кунигача Халқ билан мулоқот ва инсон манфаатлари йилида аҳолининг ижтимоий ҳимояга муҳтож қатламларини моддий ва маънавий қўллаб-қувватлашни кучайтириш, жамиятимизда ҳамжиҳатлик, меҳр-оқибат, бағрикенглик ва хайр-саховат муҳитини янада мустаҳкамлашга қаратилган суннат ва ниқоҳ тўйларини ўтказиш бўйича тадбирлар амалга оширилмоқда.

Мазкур тадбирлар доирасида никоҳ тўйлари бўлаётган ёшларнинг бандлик ҳолатини ўрганиш, банд бўлмаганларни тўй куни олдидан иш билан таъминлаш назарда тутилган.Бу ҳақда Меҳнат вазирлиги Ахборот хизмати хабар қилмоқда.

Шунга кўра 2017 йил 21 апрель куни Бухоро шаҳрида Бухоро вилояти ҳокимлиги, вилоят касаба уюшмалари ташкилотлари федерацияси, меҳнат бош бошқармаси ва бир қатор ташкилот ва идоралар ҳамкорлигида вилоятдаги кам таъминланган ва эҳтиёжманд оилалар фарзандларининг никоҳ тўйларига бағишланган тадбир ўтказилди.

Унда, Бухоро шаҳри, Ромитан, Жондор, Олот ва Ғиждувон туманларидан 20 нафар йигит-қизлар ўзлари истаган ишга жойлаштирилганлиги тадбирда тантанали эълон қилинди ҳамда меҳнат дафтарчалари топширилди.

Соатмўмин ЖУМАЕВ,

 “Туркистон-пресс”