2017-11-29

Йўлимизни ёритгувчи маёқ

Президентимиз Шавкат Мирзиёевнинг бугунги кунда биз ёшларнинг жисмонан соғлом, маънан етук, интеллектуал салоҳиятли, ватанпарвар, ўз қатъий позициясига эга, юрт тақдирига дахлдор фидойи инсонлар сифатида камол топишимиз йўлида амалга ошираётган кенг кўламли саъй-ҳаракатлари, янги босқичда бошлаган шиддатли ислоҳотлари барча тенгқурларим қатори менинг ҳам қалбимда чексиз фахр-ифтихор туйғуларини жўш урдиради. Мана шундай бетакрор диёрда, Президентим ва халқимнинг доимий эътибори ва ғамхўрлиги остида тинч, осуда, фаровон ҳаёт кечираётганимдан миннатдор бўлиб, шукроналар қиламан.

Айниқса, биз сингари ёшларни таълим жараёнига қамраб олиш, дарсдан бўш вақтларини мазмунли ташкил этиш, касб-ҳунарга йўналтириш, шу орқали ёш авлод орасида соғлом турмуш тарзини қарор топтириш, келиб чиқиши мумкин бўлган салбий ҳолатларнинг олдини олиш каби долзарб вазифалар давлатимиз сиёсатининг устувор йўналишига айлангани қувонарли ҳолдир.

Шу кунларда эркин ва фаровон ҳаётимизнинг мустаҳкам кафолати бўлмиш Бош Қонунимиз – Ўзбекистон Республикаси Конституциясининг 25 йиллигини муносиб қарши олиш ҳаракатидамиз. Барча тенгдошларим қатори менинг ҳаётимда ҳам Бош Қомусимизнинг ўрни ва аҳамияти беқиёс, албатта. Энг аввало, мен қонун билан кафолатланган ҳуқуқларимдан фойдаланиб, ўзим танлаган соҳа бўйича олий таълим муассасасида таҳсил олмоқдаман. Бу Конституциямизда инсон қадр-қиммати, манфаати, шаъни ва бошқа дахлсиз ҳуқуқлари мустаҳкамлаб қўйилгани самарасидир. Мустақил Ўзбекистон фарзанди сифатида орзуларимга етишиш йўлидаги барча эшиклар мен учун очиқ эканини биламан ва бундан ғурурланаман. Мақсадим, баркамол авлоднинг бири бўлиб етишиш, эл-юрт равнақи учун сидқидилдан хизмат қилишдир.

Бинобарин, Асосий Қонунимизнинг баркамол авлодни тарбиялашдаги ғоявий-тарбиявий аҳамияти улкан бўлиб, у биз ёшларда Ватанга садоқат, мардлик, ўзаро дўст – биродарлик туйғуларини юксалтиришга хизмат қилади. Айниқса, бахтимиз Қомусида халқимизнинг кўп асрлик анъаналари, урф-одатлари мужассамлашгани ҳам унинг муҳим хусусиятларидан биридир. Унда жамиятнинг барча қатламлари сингари ёшларнинг ҳам барча турдаги шахсий, сиёсий, иқтисодий ҳамда ижтимоий ҳуқуқ ва эркинликлари кафолатлаб қўйилган.

Таъбир жоиз бўлса, айтиш мумкинки, Конституциямизда белгилаб берилган ва кафолатланган деярли барча ҳуқуқ ва эркинликлар биз ёшлар учундир. Зеро, ёш авлодни ижтимоий ва маънавий жиҳатдан асраб-авайлаш, уларни билимли қилиб тарбиялаш, саломатлигини муҳофаза қилиш, хавфсиз ва қулай меҳнат шароитларини яратиш давлатимиз ўз олдига қўйган юксак вазифалардан бири ҳисобланади. Ёшлар ҳам жамиятнинг бошқа вакиллари қатори фикрлаш, сўз ва эътиқод эркинлиги ҳуқуқига эгадирлар. (Конституциянинг 29-моддаси). 31-моддага мувофиқ эса ёшлар учун ҳам виждон эркинлиги тўла кафолатланади.

Ўзбекистон Республикаси Конституциясининг 41-моддасида бўлса, билим олиш ҳуқуқи кафолатлаб қўйилган. Унга кўра, бепул умумий таълим олиш давлат томонидан кафолатланади. Мактаб ишлари давлат назоратидадир. Шахснинг билим олишга бўлган ҳуқуқи Конституция асосида қабул қилинган бир қатор қонунларда ҳам мустаҳкамлаб қўйилган.

Биз ўз салоҳиятимиздан эркин фойдаланишга, ўз иқтидор ва истеъдодимизни тўла намоён этишга ҳақлидирмиз. Илмий ва техникавий ижод эркинлиги, маданият ютуқларидан фойдаланиш ҳуқуқимиз кафолатланган. Давлатимиз жамиятнинг маданий, илмий ва техникавий ривожланишига ғамхўрлик қилади (42-модда). Қонун билан белгиланган ёшга етгач, бизнинг сиёсий ҳуқуқларимиз доираси янада кенгаяди.

Дарҳақиқат, биз ёшларнинг ижтимоий ҳаётнинг турли соҳалардаги ҳуқуқларимиз Конституция асосида қабул қилинган кўп сонли махсус қонунлар билан ҳам таъминланади. Таълим тўғрисида, тадбиркорлик, меҳнатга оид қонунлар, жамоат бирлашмалари, виждон эркинлиги, жисмоний тарбия ва спорт тўғрисидаги қонунлар шулар жумласидандир. Бу қонунлар бизнинг нафақат бошқалар билан тенг ҳуқуқли бўлишимизни таъминлайди, балки кўпгина имтиёзлар ва қўшимча кафолатларни ҳам ҳадя этади.

Ўз навбатида, биз ёшлар ҳам Конституциямизда мустаҳкамлаб қўйилган бурч ва мажбуриятларимизни виждонан бажаришимиз лозим. Яъни, Конституция ва қонунларга риоя этишимиз, бошқа кишиларнинг ҳуқуқлари, эркинликларини, шаъни ва қадр-қимматини ҳурмат қилишимиз, шунингдек, Ўзбекистон халқининг тарихий, маънавий ва маданий меросини асраб-авайлашга мажбур эканимизни унутмаслигимиз лозим. Биз ёшлар ҳам атроф табиий муҳитга эҳтиёткорона муносабатда бўлишимиз шарт. Конституциямизнинг 52-моддасига мувофиқ эса, Ўзбекистон Республикасини ҳимоя қилиш – Ўзбекистон Республикаси ҳар бир фуқаросининг бурчидир.

Конституциямизда ёшлар ҳуқуқ ва эркинликларининг бундай кенг қамровда кўрсатилиши давлатимизнинг ёш авлодга яратиб берган улкан имкониятларидан далолатдир.

Президентимиз Шавкат Мирзиёев жорий йил 30 июнда бўлиб ўтган «Камолот» ёшлар ижтимоий ҳаракатининг IV қурултойида сўзлаган нутқида таъкидланганидак:

“Ҳақиқатан ҳам, биз, ота-оналар, устоз ва мураббийлар сизларни, бутун Ўзбекистон ёшларини Ватанимиз, жамиятимизнинг ҳал қилувчи кучи деб биламиз ва сизлар ҳамиша халқимизнинг мана шундай юксак ишончига муносиб бўласиз, деб ишонамиз.

Сизларга яхши маълум, ҳозирги вақтда юртимизда «Буюк келажагимизни мард ва олижаноб халқимиз билан бирга қурамиз» деган шиор кенг тарқалиб, ҳаётимизга тобора чуқур кириб бормоқда. Лекин Ўзбекистонимизнинг мана шундай ёруғ ва фаровон истиқболини бунёд этишдек масъулиятли вазифани ким ўз зиммасига олади?

Албатта, фақат замонавий билим ва касб-ҳунарларни пухта эгаллаган, мустақил фикрлайдиган, доимо эл-юрт тақдирига дахлдорлик туйғуси билан яшайдиган сиз, азиз ёшларимиз майдонга дадил чиқиб, бугунги кунда ҳаётнинг ўзи олдимизга қўяётган вазифаларни ҳал этишга қодирсиз”.

Ҳа, биз – бугунги ўзбек ёшлари давлатимиз раҳбарининг бу юксак ишончига жавобан фақатгина аъло ўқиш, ижтимоий ҳаётнинг барча жабҳаларида ўз иқтидор ва салоҳиятларимизни тўлиқ намойиш этиш, ватанпарвар бўлиш, ҳар томонлама етук, комил шахслар бўлиб шаклланишга сидқидил ҳаракат қилаверамиз. Конституциямизнинг маъно-мазмунини, унинг истиқлол йилларида эришилган улкан тарихий ютуқ эканлигини теран англаб, Бош Қомусимиз биз учун нафақат муҳим ҳаётий қўлланма, балки ғурур-ифтихор, керак бўлса, шу заминда истиқомат қилаётган, миллати, тили, динидан қатъи назар, барча инсонлар учун мустаҳкам бир ҳимоя эканлигини ҳис этиб яшайверамиз.

Санжарбек ТЎХТАСИНОВ,

Наманган Муҳандислик-қурилиш институти талабаси.

“Туркистон-пресс”