2018-06-26

Ўзбекистонлик ёш шахматчилар жаҳон чемпионатининг мутлақ ғолибига айланди

Жорий йилнинг 21-25 июнь кунлари Беларуснинг Минск шаҳрида 8, 10 ва 12 ёшгача бўлган ўғил-қизлар ўртасида шахматнинг рапид ва блиц йўналиши бўйича иккинчи жаҳон чемпионати бўлиб ўтди, деб хабар берди Ўзбекистон шахмат федерацияси матбуот хизмати.

Нуфузли беллашувларда жаҳоннинг 27 мамлакатидан 780 нафар спортчи иштирок этди. Эътиборлиси, мазкур дунё биринчилигида халқаро шахмат устаси, Ўзбекистон шахмат федерацияси бош котиби Севара Боймуродова мураббийлигидаги 15 нафар ўзбекистонлик навқирон шахматчи ҳам ўзларига билдирилган ишончни оқлади.

Ҳамюртларимиздан Хумоюн Бегмуродов (8 ёш) ва Умид Омонов (12 ёш) иккитадан олтин, Афрўза Ҳамдамова (10 ёш) битта олтин ва кумуш медалларни қўлга киритган бўлса, Руқия Олимова (8 ёш), Шаҳромбек Каримов (10 ёш) ҳамда Олмос Раҳматуллаевлар (12 ёш) иккинчи ўрин соҳибига айланди.

Якуний ҳисобда Ўзбекистон терма жамоаси 5 та олтин ва 4 та кумуш медаль билан энг юқори поғонадан жой олди.

 “Туркистон-пресс”