2019-01-21

Фазлиддин Ғойибназаров профессионал рингда яна ғалабага эришди

Профессионал бокснинг супер енгил (-63,5 кг) вазн тоифасида рингга чиқаётган ҳамюртимиз Фазлиддин Ғойибназаров ўзининг навбатдаги жангини ўтказди. АҚШнинг Нью-Йорк шаҳридаги Верона шаҳарчасида ташкил этилган бокс кечасида ҳамюртимиз Доминикан Республикаси вакили Рикардо Гарсияга қарши рингга кўтарилди.

Жами 8 раундга мўлжалланган жанг атиги 4 раунд давом этди. Негаки 4-раунд якунига етгач Гарсия жангни давом эттира олмаслигини билдирди ва мазкур ҳолатда мағлуб томонга техник нокаут ёзилади. Бунгача Фазлиддин рақибини 3-раундда нокдаун ҳолатига туширган эди.

Шу тариқа Ғойибназаров профессионал боксда ўзининг еттинчи ғалабасига эришди. Бунгача у ўтказилган олтита жангини ҳам ўз фойдасига ҳал қилганди. Шундан тўрттасида рақибларини нокаутга учратган.

“Туркистон-пресс”